लमजुङको कुन गाउँपालिकामा को कार्यकारी अधिकृत तोकिए

 

लमजुङ, ४ चैत । सरकारले ४८१ गाउँपालिकाका कार्यकारी अधिकृत खटाएको छ ।

संघीय मामिला तथा स्थानीय विकास मन्त्रालयले अधिकृतहरुलाई गाउँपालिका कार्यालयहरुमा कार्यकारी अधिकृतका रुपमा काजमा खटाएको हो । मन्त्रालयले कुनै विलम्ब नगरी खटिएको ठाउँमा रमाना लिएर हाजिर हुन सबै अधिकृतहरुलाई निर्देशन समेत दिएको छ ।

सरकारले गाउँपालिकामा अधिकृत र नगरपालिकामा उपसचिवलाई नेतृत्व दिने निर्णय गरिसकेको छ ।

निर्वाचन आयोगले बिहीबारसम्म गाउँपालिका र नगरपालिकाहरुमा प्रमुख तोकेर कर्मचारी खटाउन भनेको थियो ।

सरकारले लमजुङका चार वटा गाउँपालिकामा कार्यकारी अधिकृत खटाएको छ । हाल बेसीशहर नगरपालिकामा कार्यकारी अधिकृत रहनुभएका धर्मराज लम्साललाई मस्र्याङ्दी गाउँपालिकामा खटाइएको छ । अन्य सबै गाउँपालिकामा नयाँ अनुहार छन । दोर्दी गाउँपालिकामा बमबहादुर नेपाली, क्होँलासोँथर गाउँपालिकामा दिपेन्द्र दाहाल र दुधपोखरी गाउँपालिकामा विष्णुकुमारी न्यौपाने कार्यकारी अधिकृतमा खटिनुभएको छ ।